Hohmanh Tah Lo Ding: Chantlung Dawtnak Hrifek

Pa Hmun a fanu te a zoh poh ah a thinlung hi kuaiman dih a zal tawn.Thin Hnem hi holh aa hrawtka kumthum fai a si.Ruah loin a vun i hlauh caan ah Nunu ti in a hlam ttheu tawn.Aho hi ka nu a si ti a hngal rih lo.Ka nu zeitin um ti zong a hngal lomi Thin Hnem zoh ah lungthin a khoih tuk tawn. “Papa nunu tah khoi ah a um” kei cu nunu nih daw lo e, nunu ka ngai tuk a ti tawn.

Sunghno nu zuuntlem in a hraam riangmang mi Thin Hnem bang hi vawlei ah ngakchia zeizat dah nu van hai in an hraam ve hnga mu. A pa nih ka fa veimu, nunu cu hika vawlei ram ah hin a um ti lo e, Thin Hnem le papa kha a nunu nih a dawt tuk hna. Pa Pathian nih nunu kha hi hmun vawlei um a sianh ti lo caah a lak cang. Amah sin ah kan kal te lai cu tiah a hnemh tawn.

Hmun Lian le Bor Chin hi Hakha sianginn an kainak in a hngalmi an si.Pa Hmun hi mi nuntluang, mi daidam, pa za a si. An khaan ah lengkip nih an zelh len vemi a si. Bor Ku zong hi khuapi fa aa hngalhnak ah a titsa te a ttha i mi nunnem a mithmai hi a panh zungzal ve.Cathiam si, mui ni dawh, zia nih tthat, vaal za nih an cuanh lenmi a si.

An sianginn ahcun Tlang chokhlei bang ho phentu ngei lo in a langsar vemi a si. Pa Hmun le Bor Ku hi an khaan ah cathiam bik an si. Pakhatnak le pahnihnak hi an i chang tawn.Tangkua an kaitti, tanghra an vun phan. An kar ah hngalh loin dawtnak thlaici a kheu. Bor Ku nu le pa zong nih Pa Hmun cu an dawt tuk i Bor Ku caah ti in saduh an that len ve.

A nu le pa hi mi ngei le Pathian aa bochan tukmi an si. Tanghra cu an phi i Pa Hmun khuatlun ding a si cang. Zanthla pa vang tang ah Bor Ku le Pa Hmun an caah bia fianh a har. Zan dang a lo lo, holh loin an i zoh nain an lungthin in biaza an i ruah.Pa Hmun nih pacancuh in biahram a van domh.

Bor Ku, nangmah hlei cun ka caah aho leng hmanh hi lawmhnak pe khotu an um lo. Asinain kei cu ka sining na hngalh bang in nang he conak dingah cuai ka thlai i ka thling lo e. Bor Ku cu mifim aa hngalhnak ah Pa Hmun sining cu a fiang tuk i ka dawt ka tta veimu na thachia hlah Pathian sin ah thla kan cam lai.

Khua ah ka va tlung lai i mah cun nan kan hal te lai. Ka nu le pa zong nih a tthatnak in an in leh ko hna lai. Puai tuahnak zong a zeipoh Pathian nih a khan ko lai, a van ti. Pa Hmun thinlung cu lawmhnak in a khat.Khua ah a tlung i tlawmpal ah a nu le pa le chungkhat cingla rual nih Bor Ku nu Le pa cu an len kai hna.

Biattha in an leh hna. Pa Lian cu thawng theih lai a ttihpah aa ngaih pah uite ekchuak ko khi a lo. Tlawmpal ah Puai cu an tuah. Bor Ku cu a dawtbik mi Pa Hmun he zungzal thih tiang lengtti dingin an ruun inn cu an chuah tak riangmang. Khuapi fa ngaite khuate i khuasak cu a chaiha ngai ve.

Mi fanau an inn i rawl chumh ti khing bal lo. Thil duh tawk aa thlengmi atu cu harnak lei ah a caan hman hram a thawk ve cang. Nain vuivai lo tein a dawt bikmi he an um khawh cu a caah a sunglawi bik a si. Pa Hmun nau le a nu le pa zong nih an dawt tuk hringhran.

Tlawmpal an um ah nau a hung cuang i thlano a theih ka cu a ing-ai hi celh chuak a si lo.Amah nakin Pa Hmun hi a zualhma khun rua ti awk in. A nule nih U Bor caah tiin heh tiah ramtang thingthei an hmuhmi poh an van put. A pa hi rapchiah le ramleng chuah huam ngai i zuva, sapherh hi cat lo meicung ah an i chiah.

Bor Ku cu a fim tuk ve pa Hmun nau a hniang bik pa Lia Ceu hi aa komh i amah he nitin an um. A eimi poh a pek i tolek ah a hman. A nu le pa zong nih cini, cawhnuk bu le ei din hi an kuat lengmang. Pa Hmun far le zong nih U Bor an ti i an dawt tuk.

Bor Ku hi cu kan caah khuazing bantuk a si tiah Pa Hmun nu nih innpa chakthlang sin ah a thangthat tawn. Mah kum cu an pahnih in tanghra zong an awng i Borku pa nih Vok in an nupa cun an lawmhpiak hna.Bor Ku cu a thla hung cang ziahmah.Nau ngaih lai a nai cang.

An khua le Hakha hi aa hlat ngai i ke in kal ahcun nikhat kal bak a si. Pum lawng lo caah cun a fawi lo. Sii-inn i nau ngaih a hau lo hawidang zong khuate ah pei an ngeih cio ko cu a ti i Bor Ku nih khual kal cu a duh lo.

Voikhat zan cu an nu pa tein tlingkhan cung ah saduh za an that. Nau te mui hmuh lai an i ngaih tuk Pa Hmun nih a paw te a muai nau cawl thawng a ngaih tawn. Pa Hmun nih pate siseh ti a duh, Bor Ku nih nute a duh ve.Pa Hmun nih a paw a van ngaih i ummh! Pate bak si a van ti Bor Ku nih kal.. nute si ko cuh a ti Pa Hmun cu a liang ah din tein a hei bengh.

Mah zan cu thlapa a vang i zantlai hnu kingriang mang tein fiakfai a hram. An pahnih tein bia an i ruah i ruah lo piin Bor Ku nih U Hmun leng ah tthu usi a ti. A dawtbikmi thaisung bia el siang loin an inn leng varanda ah khua cuanh pah in lungum bia an i ruah.

Mah lio ah Bor Ku nih ruah loin a hunchimmi nih Pa Hmun umtu a sualsan. Ka dawt U Hmun ruah loin hei Liam ning law leeng dang ttang na pom hnga maw? Ka dawtbik mi Bor Ku mah bia cu ziah hme na chim. Ka ttihtuk chim ti hlah nang cu ka thihtiang zungzal dawtu ah kan thimmi na si.

Dawt, kan biakam hi hmunhram seh a ti. U Hmun inn tual ah ka pua law ka chawhpi ta a si. A Pawpi he cun zantlai thlavang tang ah an i pua i duhdawtnak biaza an phai. Asinain Bor Ku a nun khing a rit, a umtu hman lo a lungleng mi a lo.

A caan ah a biapeh lo in a hmailei khi dai tein a zoh. A mithmai, zan thlapa nih a van ceuh i a caan ah a sam fa tete a hmai ah an hung tla. Pa Hmun nih a van zoh i Bor Ku biangki cungin mitthli fim tete a tlak ziahmah khi a hun huh. Ka dawt Bor Ku na ka zum lo maw nangmah lawng ka thinhnemtu tha bik na si a hung ti.

A ttangnem ah a van pom i U Hmun na ka daw taktak maw tiah bia a van hal tthan. Umm, ngaknu tlangval hmanh an si ti lo nain tuzan cu an i dawtnak hi a thuh ning a lang chinchin. Hi tluk dawtnak sung hi hngar ngam lo bak an si ko. Asinain hmailei an ton lai ding thil hi hngalcia sehlaw mu zeitluk vanchia dah kan si an ti len hnga.

Mah zan cu a king i a daihnak nih a khuh a caan ah uico boa thawng khi khualu bo in a thang tawn.Zan a tlai cang. Zanttim 3:30 hrawng ah Bor Ku um awk hngal loin a nganfak i a hung hraam. Pa Hmun nu nih a ihnak khan in ka fa zeidah cang a ti. Pa Hmun cu a van i hlau ve i a nganfah a celh lo aa teng te le a hrumm ai i inn pa nih an chuah hnawh hna.

Zantai hnu ah an khua nau ngeihter thiammi an va auh, a si khawh tawk in aa zuam. Asinain a nau ngeih a har, nihnih tiang nau ngei kho loin a um. Mi fanau zoh bak ah celh ding a si lo. A ai, a hrum, a celh hrim lo Pa Hmun le a nau pate nih a hra tein an umpi. A nu nih heh tiah Lai Arti a empiak.

Minung ruahnak in lung a dong cang. Ti awk hngalh lo ah laang an ser i Thantlang lei an kalpi. A khuapi ti awk in Bor Ku thlah ah an hung chuak. An pastor nih khuachuah lai ah Pathian sin ah thla a cam i mah cun an khuallawn lam cu an thawk.

A nganfah tuk caah ke chirhtah in an kal. Atu le tu an i din lam tanttim an phak ah a celh bak ti lo i mahka cun an i din. Ruah loin nau he lampi ah an i tthen. Nute a si Pa Hmun nih naute cu a van tuamhlawm i a nu cu a hmuhsak, Dawt nangmah nih min i sak a ti i Par Hlei Sung a sak.

Sunghno a nu nih nausem te cu hnukthlum a van dinh.Lampi nau ngaih kan ti cu zeiti van thlopbulnak zong cu a um lo. Ruah loin a nu cu thi nih a sah i mithmuh bak ah a titsano tete a rau ziahmah i a mit hmanh fiang in a au kho lo.

A tha a dih ziahmah i ka dawtbik mi pa Hmun na caah ka tling lo e.Sau hmanh lungduh in kan lengtti manh lo. Par Hlei Sung hi rak daw cikcek mu ka dawt a ti. Ka nu le ka pa zong an ngaih rak chia hlah seh. Van sui ram in ka rak in donte hna lai a ti. A tumval pa kutza tlaih buin a nunnak thaw te cu a cat riangmang.

Aw hi maw nunnak hi a si. Kannih pafa hi dah ngai kan van va chia dah mu a ti. Par Hlei Sung a zoh poh ah dawtu a pa cu a mitthli he a hraam tawn. A dawt bimi sin a biakam bangin a thih tiang Bor Ku caah zumhtlak in a um.

A tar tiang tangdang pom lo tein a dawt zuuntuar in lei dai ah ciamser ve e. Hi tluk dawtnak sung in aa dawmi an lenchan cu tawi hmanh sehlaw, an i duhdawtnak lungput cu atu in hmailei techin fapar tiang a hmun zungzal.

Chin Digest cauk ah Tlerlung (Melbourne)nih a ttialmi lak chinmi a si.

Copy paste:Chinlung post

Be the first to comment

Leave a Reply

Your email address will not be published.


*