CARELTU NAN THAWNG IN THE HAKHA POST KUM 7 KAN TLING CANG

CARELTU NAN THAWNG IN THE HAKHA POST KUM 7 KAN TLING CANG


Biahmaithi: The Hakha Post le careltu nifatin kan i pehtlaihnak hi January 12 ni khan kum sarih a tling ve cang. Kum sarih cu ngakchia taang hnihthum rual khi a si ko hnga. Asinain amah le a khaap tein tuanbia a ngei ve. Cucaah kum sarih chung careltu hna he kan i pehtlaihnak kha bukbau chung i hun fim can ah tlawmpal ka hun langhter.

Kan i lawmtuk: The Hakha Post kum 7 tiang kan phanh khawhnak hi careltu nanmah le Pathian thawng in a si, kan i lawm tuk! A bik in catlaap in a kan relpiaktu nan cung ah kan i lawm. Nifatin chungkhar sin zong rawl ei lo, mitkuh cim lo le dinh caan ngei lo in thawng a kawl i, a tialtu zung staff tuan hawi nan dihlak le nan chungkhar cung ah kan i lawm tuk. Nifatin careltu nan sin a phanh khawh nakding ah The Hakha Post catom kha zal bai le kutput in zingzaan aa chawhpitu sang le khuakip kan caphawtu vialte nan cung ah kan i lawmtuk.

Thawknak: 2012 January 12 in kan rak thawk. A voikhatnak a chuak mi hi CNF Hakha an rak luhnak kha kan rak chuah. Democracy cozah kai (2010) hnu Chin media ah a hmasa bik a si.
Zeicaah dah The Hakha Post kan ti?
Hakha a minung le holh kha si lo in, Hakha khua cu Chin miphun le Chinram khualipi a sinak, Chin miphun le Ramkulh Cozah hram bunhnak a sinak kha biapi ah chia in Hakha ah hram kan bunhnak le Hakha min kan hmannak a si.
Zeidah kan i tinh?
The Hakha Post kan ca a cungtlaang bik ah kan tial mi “Media cu Mupi Mit bang Mizapi Mitfimtertu a si” kan ti bantuk in: Kan miphun hmuhtheihnak a kauhter i kan nun a cawisangtu ca lei riantuannak si ve seh. Cun “media cu Democracy innkiltung a palinak le inn-hngaktu uico a si” an ti bantuk in Chin Ramkulh Cozah ca ah zohfeltu le rianbawmtu si ve seh. Ramchung ramleng Chinmi i pehtlaihnak ca ah hlei pakhat si ve seh. Cun kan caholh le nunphung kilvengtu si ve seh ti hna hi careltu nanmah bochan in kan i tinh.
Riantuantu mi zeidah kan si?
Atu lio zung chung riantuantu hna cu: Editor in Chief Lalawmpuia@Pa Pui, Editor in Charge Za Biak Thawng, Planning Editor B.H.Van, Online Editor & Layout Designer Salai KB Thawng, Senior Reporter Salai M.Kkung, Marketing Manager Mai Van Sui Hlawn, Accountant Tial Thawng, Marketing bawmtu Ceu Thang, Kalay Reprint Tawlreltu Thawng Uk, Khual Reporters: Lian Hup (Kalay), Chimthli (Tlangpi), Okla Bik (Matupi), Salai Henry Siang Bik Cung (Thantlang), Salai Kawi Pui (Nay Pyi Taw), Laica Ruahnakpetu Pu Hrang Tiam, Ruahnakpetu Sihni Pu Heng Cin, Tanslator pakhat, Caphawtu: Hakha ah 10, Thantlang 1, Kalay 1, Hakha le Thantlang khuate 35 ti in kan zapi minung 60 hrawng hi nifatin a chuah khawh nakding ah din lo in riantuan tuan mi kan si.

Zei thawng dah kan in thanh hna?
Ramdang le hmunpi ah cun thawngzamhca hi a phun tampi in an chuah. Asinain kannih Chinram ah cun thawng phun zulh in chuah mi a um lo ca ah careltu ca ah a tha lai ti mi poh kha kan phak khawh tawk a phunkip cawh in kan in thanh hna.
Nikum 2018 kum chung ah tualchung thawng 1141, ramchung thawng 867, ramleng thawng 527, cabia 177, zapi aw 72, muitawn 35, biazai 13, ngandamnak 33, interview 6, fakthanh 1668, thlau le hmuh 444, a zapi 3000 hrawng kan thanh khawh. Hi pin ah ca ah chuah lo in online lawng in kan thlah mi an um rih i, a zapi kum khat ah hin 4000 tluk kan chuah. The Hakha Post kan chuah thawk in nihin kum sarih tiang pehtlai in a rel mi nih cun a tlawm bik thong hleinga in thong kul kar cu kan in thanh khawh cang hna tiah kan ruah.
Voi zeizat dah kan chuah?
Kan thawkka ah zarh khat voi khat in kan chuah. Duhsah in zarh khat voi hnih le voi nga (Cawnnihnih, Cawnnithum, Cawnnili, Cawnninga le Zarhteni) tiin kan chuah. The Hakha Post nih kum sarih chung ah hin, Pu Hung Ngai chan lio ah Chin Ramkulh Cozah nih thla hnih chung a rak kan phih mi le kum fatin Christmas le Kumthar kar khar dah ti lo pelh lo tein kan chuah khawh. Atu ning hi kum khat ah a tlawm bik voi 240 leng kan chuah tawn.

Tlaap zeizat dah kan chuah?
Kan rak thawk ka ah cun voi khat chuah ah tlaap 2000 leng kan chuah nain, a man a chuak lo mi a tam ca ah le a man a chuakchom hngak in rian a tuan mi kan si ca ah, a man a pe kho mi zat vial lawng in kan thumh i nihin ah cun tlaap 1300 hrawng lawng kan chuah cang. Hi chung ah 1000 hi Hakha khua in kan careltu nan si.
Kan careltu mi zeidah nan si?
Kan thawkka hrawng ah cun Hakha, Thantlang, Falam, Matupi, Kalay, Mandalay, Yangon, Mindat, Tedim, Mizoram tiang kan rak kuat. Asinain kuatzamhnak har ruang le riantuantu (agent) thlahlawh pek khawh lo ruang ah atu ahcun Hakha, Thantlang, Kalay lawng ah kan zamh khawh cang. Minung thong sawmnga hrawng nih online (The Hakha Post Facebook le www.hapost.com) nih ramchung ramleng minung thong sawmnga hrawng nih nan rel.
Zei hna dah kan tuahchih?
The Hakha Post hi thawngzamh a si ko nain kan ram le miphun nih a herh tiah a ruah mi a ti khawh tawkte rian dang zeimawzat aa hmaithlakchih: Reprint System (Kalay le Matupi), The Hakha Post Awards, The Hakha Post Championship Paih, Miss The Hakha Post, Free Internship, Lai Biazai Relnak, Online (The Hakha Post Facebook le www.hakhapost.com), Hakhanet TV, The Hakha Post Burmese Version (Print), The Hakha Post Laica Cawnnak, Lenzai (YouTube), The Hakha Post Biaphawng Dennak, Vaarlung Meeting Room, Khuate lei Pumpawcawmnak, Special Article Issuce, Chin Nunphung Kilvennak (Sa-siir ei zuamnak), Rang Cit Zuamnak (a ralai mi Chin Miphun Ni ah tuah ding), Ngandamnak Theihtlei Cauk (tial lio mi), Muitawn Cauk (tial lio mi) le a dang pawl zong kan tuanchih ve. Hi pin ah rian dang zong i hmaithlak mi kan ngei.

Zeiruang ah dah print kan biapitter?
Nihin kan chan cu social media (zatlaang thawngzamh) chan ti a si. Asinain kannih The Hakha Post nih cun online nak in print hi biapi ah kan chiah rih. A ruang cu miphun pakhat i, a khualipi ah nifatin a chuak mi ca a um a herh bantuk in Hakha khualipi chung ah nifatin catlaap in chuah mi um ve seh ti kan duh. Cun pumpak le chungkhar thanchonak lawng si lo in kan Lai caholh le media thanchonak ca ah ca in chuah mi thawngzamh hi a herh tuk rih ca ah a miak lo nain print kan biapitternak a si.
Online media cheukhat he kan i dannak:
Nihin Chin online media cheukhat cu mah nih thawng la lo le thawnglatu zong i chiah lo in facebook le mi thawng thlah cia kha media ziaza (media ethics) zul lo in an i laak i an thlah. Cun careltu le miphun thancho nakding kha biapi ah chia lo in um hmun in tangka hmuhnak tu kha biapi ah an chiah ca ah online mileng tampi ngeih nakding ah a thurhnawm mi zir kong tiang in an thlah. Cun an thawng a tam deuh cu thawng felfai lo an si.
The Hakha Post cu kanmah nih thawng kan kawl, kan laak i kan fehter mi lawng kan thlah. Cun ramchung le ramleng thawng kan telh ding mi cu thawng hram (source) langhter le upat bu tein kan chuah. Kannih cu catlaap in a reltu hna nih nan zaal chuah in nan kan bawmh mite hin kan cawlcang.

Kanmah tein kan dir kho rih lo:
Nihin tiang cu catlaap in a rel mi nih nan kan bawmh mite hin kan i chang. Asinain thla fatin nan kan pek mi nih thla fatin kan cawlcanghnak a zohkhenh kho rih lo. Zung riantuantu thlahlawh hi thla thar ah a chuak chom hngak in kan i chuah tawn. Nifatin catlaap, cahaang le zung riantuannak ah a dih mi hi fakthanh a kan tuahter mi mante hin kan hman. Asinain cu zong nih cun a veng kho rih lo. Rian dang kan kemh mi le kan i hmaithlak mi dang pawl ca zong ah careltu le fakthanh tuahtu kan in bochan rih ko hna.
Zapi aw, thlau le hmuh le fakthanh:
The Hakha Post hi media dang nakin nan tlaihchan khunnak ah kan ruah mi cu: zapi aw, thlau le hmuh le fakthanh hi an si. The Hakha Post ah “Zapi aw” nan van tial mi nih Chin Ramkulh Cozah le cozah riantuantu hna kha inn-ka hram ah a bawk mi uico bantuk in a ven hna. Cun thiltlau nan hmuh mi kip The Hakha Post ah nan hun chuahpi i kan thanh mi nih thiltlau tampi a hmuhter hna pin ah kan nunphung le biaknak nun dawh nan kilven. Cun media kan si bantuk in fakthanh tampi nan kan thanhter mi nih The Hakha Post kha mah tein aa todelh mi media si khawh nakding a bawmhchanh.
Nifatin zeitin dah rian kan tuan?
Zing 9:00 ah thlacamnak kan ngei hmasa. Cun ni khat chung thawng laak ding (news room) kan ceih hmasa. Cuti cun khuaivah pangpar kawl bang fing le tlang kip cuul in thawng kan la i kan tial cio. Kan tial cio mi kha Layout a tuahtu nih a tuah. A hran a chuah i Ahran Reltu le Editors nih an rel i an remh. Cu hnu ah Riso namtu nih a nam. A chuakchom in Phawtzamh lei tuanvo ngeitu nih an rak bil, an tom. Cuticun sang le khual ah tiin an tliikpi i a ran khawh chung in kuat le phawt a si. A tlaangpi in zaan 7:00 hrawng ah kan i lim. Cu hnu ah Kalay, Matupi reprint le online kuat an si. Zarh khat chung ah Zarhpi ni lawng hi a min in i dinh asinain a herh ahcun thawng laak le zung kai thiam a si.

Hmailei kan cuan ve:
Miphun le Pathian riantuannak pakhat ah ruat in i hmaithlak mi a si ve bantuk in chan he aa tlaak i Chinmi nih bochan mi thawngzamh a si khawh nakding ah hinak in a ngan deuh mi thawngzamh riantuan ning le rian dang zong i hmaithlak mi zeimawzat a nge.
Careltu tampi kan in herh rih hna:
Careltu hi kan chim voi hra, “kan nunnak hrampi nan si”. Careltu nan karh chung poh kan thangcho ve lai i, nan zor chung poh kan zor ve lai. Nan tlawmtuk le nan kan ngoltak ahcun hal hau lo in kan i ngol ve ko lai. The Hakha Post le Chin media kan chan cu careltu namah cung ah a um mi a si. Kan ca nan kan cawk mi hi nanmah ca lawng si lo in kan caholh le thawngzamh thanchonak dirkamhtu zong nan si. Cucaah kan ngoltaak hram hlah u. A la rih lo mi pumpak, a bu le khuami zong nih kan laakpiak hram rih u. Cun khualeng le ramleng um mi kan unau hna zong nih nan khua le chungkhar ca ah kan cahpiak hram ve u. (The Hakha Post)

Be the first to comment

Leave a Reply

Your email address will not be published.


*